Disa nga kompanitë më të mëdha të teknologjisë ka njoftuar krijimin e një koalicioni të ri për të forcuar luftën kundër mashtrimeve online, duke synuar veçanërisht rrjetet kriminale të sofistikuara që veprojnë njëkohësisht në disa platforma. Siç raportoi fillimisht Axios, iniciativa quhet Online Services Accord Against Scams dhe përfshin emra të mëdhenj si Google, Microsoft, LinkedIn, Meta, Amazon, OpenAI, Adobe dhe Match Group.
Sipas marrëveshjes, kompanitë angazhohen të zbatojnë masa më të avancuara për zbulimin e mashtrimeve, të prezantojnë funksione të reja sigurie për përdoruesit dhe të forcojnë verifikimin për transaksionet financiare. Një tjetër element kyç është krijimi i praktikave më të mira për identifikimin, parandalimin dhe raportimin e mashtrimeve, si edhe shkëmbimi më i madh i informacionit mes kompanive dhe autoriteteve ligjzbatuese.
Në planin politik, koalicioni synon t’i bëjë thirrje qeverive që parandalimin e mashtrimeve online ta shpallin prioritet kombëtar. Megjithatë, marrëveshja mbetet vullnetare dhe nuk parashikon penalitete për kompanitë që nuk i zbatojnë plotësisht angazhimet, çka ka ngritur pikëpyetje mbi efektivitetin real të saj.
Shumë prej kompanive pjesëmarrëse kanë ndërmarrë tashmë hapa individualë. Meta, për shembull, ka prezantuar së fundmi alarme për llogari dhe kërkesa miqësie të dyshimta në Facebook, Messenger dhe WhatsApp, ndërsa LinkedIn ka vendosur kërkesa të reja verifikimi për rekrutuesit, për të frenuar mashtrimet që synojnë punëkërkuesit. Marrëveshja e re synon t’i bashkojë këto përpjekje në një front të përbashkët industrial kundër mashtrimeve online.
