Më shumë se një dekadë pas bashkëpunimit të parë mes Apple dhe Hermès për Apple Watch, shtëpia franceze e luksit ka prezantuar një koleksion të ri aksesorësh karikimi të mbështjellë me lëkurë premium për pajisjet mobile të Apple. Koleksioni i ri synon tregun super luksoz dhe vjen me çmime që e tejkalojnë ndjeshëm funksionalitetin bazë të produkteve.
Produkti më i shtrenjtë është një karikues wireless për disa pajisje, i vendosur brenda një kase të madhe prej lëkure viçi me ngjyrë ari, materiali karakteristik i Hermès. Ky model, i quajtur Grand Paddock, kushton plot 5,150 dollarë, një shifër që tejkalon ndjeshëm çmimin fillestar të një MacBook Pro 14-inç, i cili nis nga 1,699 dollarë.
Në skajin “më të përballueshëm” të koleksionit ndodhet Hermès Paddock Solo, me çmim 1,250 dollarë. Ai përfshin një disk karikimi wireless të mbështjellë me të njëjtën lëkurë cilësore dhe të zbukuruar me qepje tradicionale. Edhe pse kompania nuk specifikon fuqinë e saktë të karikimit, kërkesa për minimum 20W sugjeron mbështetje për karikim mbi 15W. Megjithatë, përshtatësi i energjisë nuk përfshihet në paketim, vetëm kabllo i karikimit është i përfshirë.
Çmimet rriten më tej me modelet Paddock Yoyo dhe Paddock Duo, secili me çmim 1,750 dollarë, të aftë për të karikuar një Apple Watch ose dy pajisje njëkohësisht. Të gjitha këto karikues mund të kombinohen me kasa lëkure të madhësive të ndryshme për transport aksesorësh, ku Grand Paddock ofron hapësirën më të madhe. Koleksioni thekson luksin, dizajnin dhe statusin, më shumë sesa nevojën praktike.
