Shqipëria ka mësuar këtë të enjte kundërshtarët e fazës play off, me kuqezinjtë që do të ndeshen më 26 mars me Poloninë dhe në rast kualifikimi, do të ketë përballë 5 ditë më vonë fituesin e Ukrainë-Suedi.
Përballë këtyre dy skuadrave, Shqipëria numëron nga një fitore me secilën.
Ukrainën e mundëm për herë të fundit një vit më parë në Ligën e Kombeve me përmbysje, me rezultatin 1-2, por në ndeshjen e kthimit në Tiranë, na mundi me të njëjtin rezultat.
Në total, me këtë kundërshtar numërojnë vetëm 1 fitore, 1 barazim dhe 6 humbje.
Sa i përket Suedisë, kuqezinjtë nuk numërojnë asnjë fitore zyrtare, por vetëm një në miqësoren e vitit 2004 me rezultatin 2-1.
Në total, ata na kanë mundur 4 herë, ndërkohë që numërojmë dhe një barazim. Dueli i fundit me nordikët ishte miqësorja e marsit 2024, ku u mposhtëm 1-0.
