Administrata e Donald Trump ka pezulluar përkohësisht të gjitha vendimet për azil, pas të shtënave me armë zjarri në Washington DC ndaj dy pjesëtarëve të Gardës Kombëtare. Drejtori i Shërbimit të Shtetësisë dhe Imigracionit (USCIS), Joseph Edlow tha se procesi do ndalohet derisa “të garantohet verifikimi maksimal i çdo të huaji”.
Vendimi erdhi vetëm disa orë pasi presidenti Trump premtoi një “pezullim të përhershëm të migracionit” drejt SHBA-së nga të gjitha vendet e ashtuquajtura “të botës së tretë”. Paralajmërimet e tij pasuan sulmin e së mërkurës, për të cilin është arrestuar 29-vjeçari afgan, Rahmanullah Lakanwal, i cili kishte shkuar në SHBA në vitin 2021 përmes një programi për afganët që kishin bashkëpunuar me forcat amerikane.
USCIS u ka kërkuar zyrtarëve të mos marrin vendime për aplikimet për azil, megjithëse puna për shqyrtimin e tyre mund të vazhdojë deri në fazën para-vendimit. Po ashtu, Shtetet e Bashkuara kanë pezulluar të gjitha kërkesat e emigracionit nga Afganistani dhe kanë paralajmëruar rishqyrtim të kartave të gjelbra për qytetarë nga 19 vende të ndryshme.
Trump ka ashpërsuar retorikën ndaj emigracionit pas ngjarjes. Kombet e Bashkuara kanë kërkuar që SHBA të respektojë angazhimet ndërkombëtare për mbrojtjen e azilkërkuesve.
Njëra anëtare e Gardës që u plagos, 20-vjeçarja Sarah Beckstrom, ndërroi jetë, ndërsa pjesëtari tjetër i Andrew Wolfe, po lufton për jetën.
