Është ndarë sot nga jeta Artur Zheji, një ndër figurat më të spikatura të mendimit, publicistikës dhe gazetarisë shqiptare.
Publicist, analist, mendimtar dhe një prej zërave më të qartë të shoqërisë sonë, ai u shua në moshën 64-vjeçare, pas një arresti kardiak në Sarandë. Sipas njoftimit zyrtar të policisë, Zheji është ndjerë keq rreth orës 16:10 dhe ka ndërruar jetë gjatë transportit drejt spitalit.
I lindur më 29 gusht 1961 në Tiranë, Artur Zheji vinte nga një familje e njohur me rrënjë të forta në historinë dhe kulturën shqiptare. Djali i gjuhëtarit të shquar Petro Zheji dhe i aktores së njohur Besa Imami, ai u rrit në një mjedis të pasur kulturor e intelektual, i cili do t’i shërbente si bazë në rrugëtimin e tij si gazetar dhe mendimtar politik.
Zheji nuk ishte thjesht një analist. Në një kohë të mbingarkuar me lajme të menjëhershme dhe debate shpesh sipërfaqësore, ai kishte guximin të ngrinte pyetje të thella, të sfidonte mendësitë e zakonshme dhe të depërtonte në kuptimin e ngjarjeve.
Gjatë karrierës së tij të gjatë, dha një kontribut të çmuar në disa nga institucionet më të rëndësishme mediatike të vendit. Ka qenë drejtues në Radio Televizionin Shqiptar, në Agjencinë Telegrafike Shqiptare dhe kryeredaktor i gazetës “Mapo”, ku u dallua për analizat e thelluara dhe stilin e tij të drejtpërdrejtë. Publikut iu bë i njohur sidomos përmes emisionit “360 Gradë”, ku solli zëra e mendime të ndryshme me integritet dhe profesionalizëm.
I lidhur ngushtë me vendin e tij, me historinë dhe trashëgiminë kombëtare, Zheji ishte një kritik i drejtë dhe një dashamirës i Shqipërisë. Ai besonte se dashuria për atdheun shprehet përmes guximit për të thënë të vërtetën, pavarësisht sa e vështirë mund të tingëllojë ajo.
Nip i studiuesit të njohur Gjergj Zheji dhe pjesë e një dinastie të shquar intelektuale, Artur Zheji mishëroi përkushtimin ndaj dijes, lirisë së mendimit dhe përgjegjësisë publike. Ai u bë mentor për shumë gazetarë të rinj, koleg i respektuar dhe njeri me parime të patundura.
Ikja e tij lë një boshllëk të madh në median shqiptare dhe në jetën publike të vendit. Zëri i tij do të mungojë në debatet e ditës, në editorialet e kthjellëta dhe në analizat që nxisnin reflektim e diskutim të thelluar.
Bashkëpunëtor i Top Channel që prej themelimit të këtij televizioni nga Dritan Hoxha, e deri në ditët e fundit si analist në emisionin “Top Story”, Zheji mbetet një pikë referimi për ata që zgjedhin të mendojnë para se të flasin dhe të pyesin para se të gjykojnë. Figura e tij është e lidhur ngushtë me zhvillimin e mendimit kritik dhe jetës publike në Shqipëri, duke u kujtuar si një gazetar e analist me integritet, që i dha peshë e seriozitet debatit publik shqiptar.
