Presidenti i Iranit deklaroi se kërkesa e SHBA-ve për një dorëzim pa kushte është një “ëndërr që ata duhet ta marrin me vete në varr”. Mahsoud Pezeshkian gjithashtu kërkoi falje për sulmet e Iranit ndaj vendeve rajonale duke insistuar se Teherani do t’i ndalojë dhe duke thënë se ato ishin shkaktuar nga keqkomunikime brenda radhëve.
Presidenti tha se këshilli i përkohshëm i udhëheqjes së Iranit kishte miratuar që asnjë sulm ose goditje me raketa nuk do të kryhej ndaj vendeve fqinje, përveç nëse një sulm kundër Iranit do të vinte nga ato vende.
Presidenti amerikan Donald Trump u kundërpërgjigj duke thënë se deklarata e Pezeshkian tregoi se Irani iu dorëzua vendeve të rajonit dhe kjo përbën humbjen e parë në mijëra vite. Trump kërcënon se sot do të nisë një sulm i egër ndaj pozicioneve dhe njerëzve që nuk ishin planifikuar më herët gjatë operacionit luftarak.
Ndërkohë, sulmet iraniane goditën shtetet arabe të Gjirit Persik kurse paralelisht Irani po shënjestrohej nga SHBA e Izraeli. Një avion është djegur në aeroportin Mehrabad Airport, aeroporti më i populluar në Iran dhe qendra kryesore për fluturimet e brendshme. Imazhet satelitore tregojnë se në aeroport ndodheshin disa avionë. Mediat shtetërore iraniane po raportojnë gjithashtu se disa pjesë të aeroportit janë vënë në shënjestër. Kjo vjen pasi ushtria e Izraelit tha se po nis një “valë të re sulmesh në shkallë të gjerë” në vend, në strukturat kryesore.
Më herët ajo kishte goditur aeroportin më 4 mars, duke thënë se sulmet e saj çmontuan sistemet e mbrojtjes dhe zbulimit që përbënin kërcënim për Forcën Ajrore izraelite, përfshirë edhe sektorin e prodhimit të helikopterëve në aeroport. Ende nuk është e qartë se cilat pjesë të aeroportit janë bombarduar në sulmin e ri, por dëshmitarët thonë se bombardimet e kësaj nate kanë qenë shumë më intensive.
Sekretari amerikan i Mbrojtjes Pete Hegseth, tha se Donald Trump është “plotësisht i vetëdijshëm se kush po flet me kë”. Ambasadori i Iranit në Kombet e Bashkuara thotë se 1,332 civilë janë vrarë në vendin e tij që nga e shtuna.
Prodhuesit amerikanë të armëve kanë rënë dakord të “katërfishojnë prodhimin”, tha Donald Trump. Pas telefonatës mes Italisë, Gjermanisë, Francës dhe Mbretërisë së Bashkuar për koordinimin ushtarak dhe diplomacinë e përbashkët që duhet të ndiqet, zv/ministri i Jashtëm i Teheranit kërcënoi Europën: “Kush i bashkohet agresionit bëhet një objektiv i ndjeshëm.”
