“I dashur President Putin,” – nis letra e Zonjës së Parë.
“Çdo fëmijë ndan të njëjtat ëndrra të qeta në zemër, qoftë i lindur rastësisht në një fshat të thjeshtë apo në qendër të një qyteti madhështor. Ata ëndërrojnë për dashuri, mundësi dhe siguri nga rreziqet.”
“Si prindër, është detyra jonë të ushqejmë shpresën e brezit të ardhshëm,” vazhdon letra.
“Si udhëheqës, përgjegjësia për të mbajtur gjallë ëndrrat e fëmijëve tanë shkon përtej rehatisë së disa të privilegjuarve.”
“Pa dyshim, ne duhet të përpiqemi të ndërtojmë një botë të mbushur me dinjitet për të gjithë – që çdo shpirt të zgjohet në paqe dhe e ardhmja të jetë e mbrojtur në mënyrë të përsosur,” shkruan Zonja e Parë.
“Një koncept i thjeshtë por i thellë, zoti Putin, siç jam e sigurt se edhe ju pajtoheni, është se pasardhësit e çdo brezi e nisin jetën e tyre me një pastërti – një pafajësi që qëndron mbi gjeografinë, qeverisjen dhe ideologjinë.”
Zonja e Parë shton se “në botën e sotme, disa fëmijë detyrohen të mbajnë një të qeshur të qetë, të paprekur nga errësira që i rrethon – një sfidë e heshtur ndaj forcave që mund t’u marrin të ardhmen.”
“Zoti Putin, ju mund të riktheni me një vendim të vetëm melodinë e asaj të qeshure. Në mbrojtje të pafajësisë së këtyre fëmijëve, ju do të bëni më shumë se të shërbeni vetëm Rusinë – ju do t’i shërbeni mbarë njerëzimit,” shkruan ajo.
“Një ide kaq e guximshme kapërcen çdo ndarje njerëzore, dhe ju, zoti Putin, jeni i aftë ta vini në zbatim këtë vizion me një të vetme firmë sot. Është koha.”
“Letra e paqes” e zonjës Trump u shkrua përpara takimit historik të bashkëshortit të saj me Putinin në Anchorage, Alaska, ditën e premte. Ky samit i nivelit të lartë ishte takimi i parë SHBA–Rusi që nga qershori i vitit 2021, gjatë administratës së ish-presidentit Joe Biden dhe vetëm tetë muaj para pushtimit rus të Ukrainës.
Edhe pse Trump dhe Putin nuk ishin takuar ballë për ballë prej vitesh para së premtes, ata kishin zhvilluar disa biseda telefonike këtë vit për të diskutuar mbi fundin e luftës së Rusisë në Ukrainë.
Pas takimit, Presidenti Trump e cilësoi samitin si “jashtëzakonisht produktiv”, por pranoi se palët “ende nuk ishin aty” për një marrëveshje përfundimtare.
“Pati shumë, shumë pika ku ramë dakord, shumicën prej tyre, do të thoja,” – u tha Trump gazetarëve.
“Disa çështje të mëdha ende nuk i kemi përmbyllur, por kemi bërë përparim. Pra, nuk ka marrëveshje, derisa të ketë një marrëveshje.”
