Evropa po ndërmerr një hap të madh për të reduktuar varësinë nga kompanitë teknologjike amerikane dhe kineze duke ndërtuar një infrastrukturë të re cloud dhe inteligjence artificiale. Projekti i ri, i quajtur EURO-3C, u prezantua nga kompania telekomunikuese Telefónica gjatë Mobile World Congress në Barcelonë, ku Geek Room ishte i pranishëm së bashku me Neptun, dhe mbështetet nga Komisioni Evropian.
Iniciativa bashkon më shumë se 70 organizata, përfshirë operatorë telekomi, kompani teknologjike, startup-e dhe ndërmarrje të vogla e të mesme. Qëllimi është krijimi i një infrastrukture të federuar ku cloud, AI dhe edge computing mund të funksionojnë së bashku për të përshpejtuar zhvillimin e shërbimeve dixhitale në Evropë.
Ndryshe nga ndërtimi i një platforme të vetme cloud nga e para, projekti synon të lidhë infrastrukturat ekzistuese kombëtare në një rrjet të përbashkët që funksionon përtej kufijve.
Kjo nismë vjen edhe pas shqetësimeve në rritje për varësinë e Evropës nga infrastruktura IT e SHBA-së, sidomos pas disa ndërprerjeve të shërbimeve cloud vitin e kaluar. Ekspertët paralajmërojnë se një varësi e tillë mund të krijojë rreziqe strategjike, ekonomike dhe sigurie për kontinentin.
Industritë e rëndësishme që pritet të përfitojnë nga kjo infrastrukturë përfshijnë sektorin automobilistik, shëndetësinë dixhitale (e-health), shërbimet publike dhe cloud-et qeveritare sovrane. Një fokus i veçantë do të jetë edhe zhvillimi i AI autonome (agentic AI), sisteme që mund të ndërmarrin veprime në mënyrë të pavarur.
