Ka përfunduar procesi i numërimit të votave për zgjedhjen e kryetarit të degës së PD në Sarandë.
Nga rezultati përfundimtar i numërimit të votave në krye të PD dega Sarandë u zgjodh Matilda Qurku, e cila ka arritur të sigurojë 145 vota nga anëtarësia pjesëmarrëse në proces.
Ndërkohë që kandidati tjetër Kreshnik Shehu mori 64 vota, ndërsa 6 vota u shpallën të pavlefshme.
Procesi i votimit u zhvillua në një klimë të qetë dhe me një pjesëmarrje prej 215 votues nga 1280 të regjistruar, të cilët ushtruan të drejtën e tyre për të zgjedhur drejtuesin e ri të degës, na tha Aleksandër Çobani, kryetar i FRPD, degës Sarandë.
Pas përfundimit të numërimit, rezultati u shpall nga komisioni përkatës, duke formalizuar kështu kreun e ri të degës për mandatin e ardhshëm. Kryetarja e re e degës së PD Sarandë, Matilda Qurku, falënderoi të gjithë anëtarët që e besuan, duke e zgjedhur atë të drejtojë tanimë degën e PD të Sarandë.
Qurku garantoi gjithashtu, angazhim maksimal në forcimin dhe bashkimin e strukturave të kësaj force politike.
I deleguar nga qendra në këto zgjedhje ishte Nikolin Cali, kryetar FRPD.
