Flet Jonian Antoni, administrator i “Century 21 Albania”
Tregu i pasurive të paluajtshme në bregdetin shqiptar vijon të mbetet dinamik në vitin 2026, me rritje të projekteve të reja dhe interes të lartë për blerje, veçanërisht nga të huajt.
Sipas Jonian Antonit, nga “Century 21 Albania”, me gjithë shtimin e ofertës në të gjithë vijën bregdetare, nuk ka rrezik për mbiofertë, pasi kërkesa mbetet e lartë, sidomos nga të huajt.
Z. Antoni thotë se vilat po blihen për qëllime banimi si shtëpi e dytë, apartamentet për qëllime investimi dhe lënie me qira ditore.
Si paraqitet sivjet situata në tregun e shitblerjes së pasurive të paluajtshme për zonat bregdetare? A rezulton se ka shtim të ofertës, projekte të reja? Në cilat zona po zhvillohen më shumë projektet e reja?
Në vitet e fundit, sidomos 2024-2025, kemi parë një rritje të madhe të lejeve dhe projekteve në zonat bregdetare. Kjo reflekton edhe rritjen e interesit të kërkesës.
Po shikojmë një transformim ku Shqipëria po përparon përditë e më shumë drejt një zone turistike të afirmuar dhe me siguri të lartë për të pasur pronën dhe banesën e dytë.
Projekte të reja po zhvillohen në gjithë zonat bregdetare, nga Jugu në Veri. Për momentin, oferta është e duhur dhe nuk shikojmë mbingarkesë të ofertës, përkundrazi ka kërkesë të lartë për prona të mbaruara me hipotekë, të cilat ende nuk janë hedhur në tregun ndërkombëtar.
Krahasuar me vitin e kaluar, si paraqitet kërkesa për blerje të pronave? A ka pasur luhatje në rritje apo në rënie?
Situata në zonat bregdetare vazhdon të jetë e nxehtë dhe me kërkesë të lartë. Sërish vazhdon të ketë interes të thelluar nga Çekia, Sllovakia, Polonia dhe Hungaria. Interesi i lartë vijon gjithnjë nga Kosova, Maqedonia e Veriut dhe sidomos nga diaspora.
Në vitin e fundit është rritur edhe kërkesa për zonat elitare dhe si rrjedhojë, edhe çmime më të larta, kryesisht të pozicionuara nga Vlora e poshtë.
Nga konstatimet tuaja, cilat tipologji të pronave po kërkohen më tepër për qëllime banimi, apartamentet apo vilat?
Pa diskutim që apartamentet. Edhe Shqipëria ndjek trendin botëror ku apartamentet janë më të kërkuara dhe më të shumta në numër sesa vilat.
Në raport me vjet, si kanë ndryshuar çmimet e shitjes së apartamenteve dhe vilave, a ka pasur rritje të tyre?
Në krahasim me 2025 nuk priten rritje serioze të çmimeve në vitin 2026. Politika e çmimeve nga ndërtuesit ka qenë e njëjtë dhe nuk ka pasur ndryshime të theksuara.
Mund të themi që çmimet i kanë absorbuar rritjet dhe nuk priten të rriten këtë vit. Ndoshta mund të kemi disa rritje në vitin 2027 e më tej duke u afruar integrimi në Europë i Shqipërisë, ose me hapjen e marinave turistike dhe disa dhjetëra hoteleve që janë në ndërtim.
Bregdeti ka çmime komplekse, të cilat variojnë sipas zonave të ndryshme nga Jugu në Veri, gjithashtu çmimet variojnë nga afërsia me detin apo vendndodhja fizike, kështu që është e vështirë të bëj një përgjithësim çmimi, sepse kam përshtypjen do ta ngatërronte lexuesin.
Cilët po blejnë më tepër në zonat bregdetare, të huajt apo vendasit? Cilat janë arsyet e transaksioneve? Vilat janë për qëllime investimi, banimi etj.?
Nga studimi ynë, 50% e blerësve janë të huaj. Sipas rendit: Kosova, Çekia, Maqedonia e Veriut, Polonia, Hungaria, Sllovakia. Kryesisht shtete që nuk kanë dalje në det ose më saktë akses në Detin Mesdhe.
Vilat blihen kryesisht për qëllime banimi si shtëpi e dytë. Apartamentet, për qëllime investimi dhe lënie me qira ditore.
Bazuar në analizat, dhe duke supozuar se nuk ka ndonjë luftë ose krizë globale, atëherë mund të themi me bindje që në bregdetin shqiptar, çmimi planifikohet të rritet me 70–100% në 5 vitet e ardhshme dhe për këtë arsye, çdo blerje prone do të sillte edhe fitime kapitale të rëndësishme.
Sipas jush, në krahasim me vendet e rajonit, si ndryshojnë çmimet e shitjes së apartamenteve në bregdetin shqiptar?
Sipas analizave tona, Shqipëria është ende e nënvlerësuar në çmimet e shitjes në zonat bregdetare. Ne jemi munduar të analizojmë tre fasha me njëra-tjetrën me Malin e Zi dhe Greqinë.
Për shembull, në Malin e Zi, kompleksi turistik në Tivar, i cili është edhe më i liri, fillon me një çmim rreth 3,700 euro/m². Të njëjtën gjë mund të themi edhe për Greqinë, në zonën e Lefkadës ose në Selanik.
Ndërkohë një zonë e mesme në Malin e Zi, si Budva ose Tivat, metri katror shitet duke filluar nga 6,500–7,000 euro/m².
Ndërsa zonat elitare në Malin e Zi si resortet “Portonovi”, “Porto Montenegro”, “Dukley”, “Lushtica Bay” etj., çmimet fillojnë nga 9,500 euro dhe arrijnë në 15,000 euro/m².
Të njëjtën gjë mund të thoshim edhe në Greqi në zonat elitare rreth Athinës apo në ishujt si Mykonos, Santorini, Lefkada, ku çmimet fillojnë mbi 10,000 euro/m².
Ndërsa në Shqipëri, çmimet më të larta janë pozicionuar 3,700 – 4,000 euro/m², ku rrallëherë ndonjë banesë e mbaruar ofrohet edhe me 5,000 euro/m². Si rrjedhojë, nëse Shqipëria do të përparojë siç ka bërë në 5 vitet e fundit në turizmin global, atëherë edhe çmimet e banesave do të rriten në raport me zhvillimin e turizmit.
Të mos harrojmë se në 5 vitet e ardhshme pritet të hyjnë në tregun shqiptar të paktën 20 hotele me 5 yje nga markat ndërkombëtare më të mëdha në botë. Me projekte si Vlora Marina, Durrës Marina dhe Sazani pritet të vijnë edhe të paktën 15 hotele të tjera ndërkombëtare. Si rrjedhojë, ky zhvillim në turizëm pritet të rrisë interesin e blerësve dhe çmimet në treg.
Lexoni edhe:
Të huajt “pushtojnë” bregdetin, apartamentet arrijnë 6 mijë euro/m², vilat deri në 3 milionë euro
Ky është artikull ekskluziv i Revistës Monitor, që gëzon të drejtën e autorësisë sipas Ligjit Nr. 35/2016, “Për të drejtat e autorit dhe të drejtat e lidhura me to”.
Artikulli mund të ripublikohet nga mediat e tjera vetëm duke cituar “Revista Monitor” shoqëruar me linkun e artikullit origjinal.
